《誰是黃欣？》  吳品瑜著，玉山出版社，2025年12月

咱攏知影蔣渭水、林獻堂、連橫，毋過罕得有人會記得黃欣。

黃欣，佇日本時代的政治、經濟、文化、教育、戲劇...等領域扮演重要的角色，一个人兼欲倚五十種身份，自頭到尾煞攏干焦會當佇殖民體制的夾縫當中走跳。伊毋是激烈的抗日英雄，嘛毋是干焦會扶日本人的「走狗」，是活佇臺灣歷史的灰色地帶，巧妙走揣家己做主的空間。

黃欣的性命史，是台南，嘛是台灣的故事。只有重新熟似遮的予時代放袂記得的性命，咱才有才調佇觀光佮演算法切割的城市內，揣著屬咱家己的歷史佮精神根頭。

非常幸運，黃欣身後留落來六百五十三首詩作，袂輸「詩史」，用寫實紀錄片的方式，活跳雕塑當時的人、事、物。黃欣的詩，毋但記錄歷史，閣較可貴的是展現伊佇語言、文化、性別、認同等議題之間徙步佮超越。伊的書寫突破形象、黨派、父權、世代佮專業的結構，尋揣上大的共識，展現超越時代的深刻觀察。

今年，阮有幸得著《誰是黃欣？》這本冊的作者吳品瑜女士大力支持，再度集合濟濟台語有志，並且佮一群對台語文學有興趣的少年學生合作，透過廣播劇佮趣味的單元，為大眾呈現一段軁迵百年台灣的歷史紀錄。