拋荒的故事
「拋荒」這句台語的原意是講田園放咧毋種作，據在伊發草荒廢。出身彰化二林的資深台文作家陳明仁先生，佇西元2,000年就用「拋荒」做標題，出版六輯《 拋荒的故事》台文小說，2012年由前衛出版社出版有聲冊版。
《拋荒的故事》是用散文風格寫作的台文小說，總共有六輯36篇「田庄紀事」，分別是「第一輯：田庄傳奇紀事」、「第二輯：田庄愛情婚姻紀事」、「第三輯：田庄浪漫紀事」、「第四輯：田庄囡仔紀事」、「第五輯：田庄人氣紀事」及「第六輯：田庄運氣紀事」。
前中山醫學大學台灣語文學系教授廖瑞銘(1955-2016)評論《拋荒的故事》：「講的攏是台灣五、六○年代農村的故事，而且多數是用囡仔的角度來描寫農村的景致、生活、無仝同族群、無仝貧富階級之間和諧的鬥陣，特別有說服力。」
陳明仁先生講：「台語原本講的攏是具體、寫實的事物，若要提升做文學語，就需要一寡對具體事物提煉出來的書面語，伊就是用這个概念來開發另一種母語文學的寫作風格。」出版《拋荒的故事》另外一个用意，是希望讀者透過故事熟似台灣這塊土地過去的生活型態佮語言文化，了解老一輩台灣人按怎思想、按怎生活。
廖瑞銘教授講：「陳明仁《拋荒的故事》系列，佮伊其他的台語文學作品，攏透露出他伊創作的終其尾目的，毋是展現個人的文學才情，伊上關心的猶原是走揣台灣人的價值觀，建立台灣人的文化主體性。運用各式各樣的文學技巧，目的攏是欲傳承保存台灣人的母語、台灣人的形象佮台灣人的生活歷史文化。雖然歷史佮童年攏無法度閣翻頭重來，毋過，用母語的形式佇耳邊不斷轉踅，凡勢會使一代閣一代提醒：台灣人曾經遐邇迷人。」
播出時間
7月20起，每禮拜日早起10點-11點、暗時9點-10點，到2026年3月22止，總共36集
節目內容
台語廣播劇：
將36篇田庄紀事，以變動上少的原則編做口白佮對話，由戀戀曾文溪配音團隊佮第五屆台語廣播配音研習營的學員配音演出，予故事內面的人物閣較真實、活跳，提供聽友"沉浸式"的語言體驗。(編劇/賴嘉仕，台文校正/洪宿芬、夏玉華)
放伴來話仙：
邀請「台文博覽會-Tâi-oân文學讀冊會」、「Làu台語-瑞士ê台語社-陳明仁台語文學讀冊會」、「鼓吹台語社讀冊會」等三个讀冊會讀冊伴代表，針對當集故事的劇情、人物、語言...等，佮作者陳明仁先生分享感想以及QA問答，予聽友深入了解作者的創作背景佮內心世界。
文學的見解：
邀請李江卻台語文教基金會陳豐惠執行長、台中教育大學台文系楊允言教授、丁鳳珍教授、國立成功大學台文系陳慕真教授等4位專家學者，用文學的觀點紹介【拋荒的故事】，提供聽友無仝的視野佮思考。
來抾俗諺語：
邀請台語專家、前台灣歌仔冊學會理事長蕭藤村老師，講解當集故事內面的俗諺語以及特殊的語詞，共咱祖先寶貴的生活智慧佮母語抾倒轉來。
節目影音
8月20起，每禮拜三佇YouTube、Podcast上架，總共36集
指導補助
文化部影視及流行音樂產業局
企劃&主持
賴嘉仕
戀戀曾文溪著獎記錄
2018年【廣播金鐘獎】「最佳非流行音樂類」節目獎&主持人獎 得獎
2021年【廣播金鐘獎】「廣播劇獎」入圍
2023年【廣播金鐘獎】「藝術文化節目獎」入圍
2024年【第3屆世界台灣文化獎】「廣播電台賞」
2024年【廣播金鐘獎】「藝術文化節目獎」入圍
專案首頁
顧問來賓
讀冊會
分集預告
配音團隊
配音研習
節目抽獎
線上收聽