第21集 阿丁特別為我留的人間極品

作者：陳懿翔(桃園市，老師)
讀念：陳懿翔

   咱查埔人上常佮其他查埔開講的話題，一定有「做兵」，畢竟這是每一位男性對咱國家應盡的義務，就算你彼陣有偌毋甘願。毋過，佇彼个全部攏仝性別，逐家年歲又閣差不多的環境進行軍事訓練，其實不止仔好耍。所以，雖罔退伍十冬，看著這篇，我嘛有同感，袂輸做兵的記持轉來矣。

文章內，作者阿欽和做職業仔，嘛是隔壁連的班長阿丁原本無熟識，兩人煞因為阿丁厝裡急咧用錢，透過關係共當當時咧做行政士的阿欽借錢周轉。阿丁嘛是可憐，阿兄咧東部的山頭駛卡車，結果出代誌，規个人和車攏摔佇山跤，人就按呢曲去。三个囡仔讀書的註冊費，就由阿丁這做阿叔--ê擔落來。阿丁是一个知影「食果子拜樹頭」ê人，逐不時嘛偷偷仔提好料--ê，用「出任務」ê藉口招阿欽去食。也就因為按呢，兩人變做真好ê朋友。

不而過，退伍了後ê作者，就佮阿丁久年無聯絡矣。佇電影公司食頭路ê作者，有一工為著一齣電影，愛去山區踏查。一位踮山區國校仔教冊ê老師，負責鬥tshuā路。聖拄聖，這位老師，就是阿丁其中一个姪仔，講in阿叔想欲請伊食「人間好物仔」。 這篇故事，其實想要探討ê議題誠深，並毋但只是咧講做兵熟識ê仝梯爾爾。「原住民佇臺灣社會結構ê處境」應該是吳念真先生真正想欲予逐家注意ê議題。超過四十年前ê故事，臺灣社會這馬對無仝族群ê態度敢有改變？有啥物改變咧？值得咱斟酌思考。